വിജയം ആവർത്തിക്കുമോ? പ്രേമലു ടീമിന് കൈകൊടുത്ത് സന്ദീപ് പ്രദീപ്; ഒരുങ്ങുന്നത് റൊമാന്റിക് കോമഡി?

പടക്കളം, എക്കോ എന്നീ സിനിമകളുടെ വമ്പൻ വിജയത്തോടെ മലയാളത്തിലെ യുവതാരങ്ങൾ മുന്നിൽ നിൽക്കുന്ന നടൻ ആണ് സന്ദീപ്. രണ്ട് ചിത്രങ്ങളിലെയും നടന്റെ പ്രകടനം ഏറെ ശ്രദ്ധിക്കപ്പെട്ടിരുന്നു. കോസ്മിക് സാംസൺ എന്ന സിനിമയിലാണ് നിലവിൽ സന്ദീപ് അഭിനയിച്ചുകൊണ്ടിരിക്കുന്നത്. ഇപ്പോഴിതാ പ്രേമലു ടീമിനൊപ്പം നടൻ കൈകോർക്കാൻ ഒരുങ്ങുന്നു എന്ന റിപ്പോർട്ടുകൾ ആണ് പുറത്തുവരുന്നത്.

പ്രേമലുവിന്റെ തിരക്കഥാകൃത്തുക്കളിൽ ഒരാളായ കിരൺ ജോസി ആദ്യമായി സംവിധാനം ചെയ്യുന്ന സിനിമയിൽ സന്ദീപ് ആണ് പ്രധാന വേഷത്തിൽ എത്തുന്നത്. നടനും തിരക്കഥാകൃത്തുമായ അനുരാജ് ഓ ബി ആണ് ഈ സിനിമയ്ക്കായി തിരക്കഥ ഒരുക്കുന്നത്. ഭാവന സ്റ്റുഡിയോസ് ആണ് ഈ പ്രൊജക്റ്റ് നിർമിക്കുന്നത് എന്നാണ് റിപ്പോർട്ടുകൾ. പ്രേമലു പോലെ ഇതും ഒരു റൊമാന്റിക് കോമഡി സിനിമ ആണോ എന്നാണ് ഏവരും ഉറ്റുനോക്കുന്നത്. സന്ദീപ് പ്രദീപിനെ നായകനാക്കി വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ, ഡി ഗ്രൂപ്പ് ബാനറിൽ മാനുവൽ ക്രൂസ് ഡാർവിൻ എന്നിവർ ചേർന്ന് നിർമ്മിക്കുന്ന ചിത്രമാണ് കോസ്മിക് സാംസൺ. ജോൺ ലൂതർ എന്ന സിനിമയ്ക്ക് ശേഷം അഭിജിത് ജോസഫ് രചിച്ചു സംവിധാനം ചെയ്യുന്ന ഈ ചിത്രത്തിന്റെ ഷൂട്ടിംഗ്പുരോഗമിക്കുകയാണ്.

മിന്നൽ മുരളി ,ആർ ഡി എക്സ്, മുന്തിരിവള്ളികൾ തളിർക്കുമ്പോൾ, ബാംഗ്ളൂർ ഡെയ്സ് തുടങ്ങി ഒട്ടനവധി വമ്പൻ ഹിറ്റുകൾ സമ്മാനിച്ച നിർമ്മാണ കമ്പനിയാണ് സോഫിയ പോളിന്റെ ഉടമസ്ഥതയിലുള്ള വീക്കെൻഡ് ബ്ലോക്ക്ബസ്റ്റേഴ്സ് നിർമ്മിക്കുന്ന പത്താം ചിത്രം കൂടിയാണിത്. 2026 പകുതിയോടെ ചിത്രം തിയേറ്ററിൽ എത്തിക്കാനാണ് പ്ലാൻ ചെയ്യുന്നത്. മുകേഷ്, മിയ ജോർജ്, അൽത്താഫ് സലിം, അൽഫോൻസ് പുത്രൻ, അനുരാജ് ഒ ബി എന്നിവരും ഏതാനും പുതുമുഖങ്ങളുമാണ് ചിത്രത്തിലെ മറ്റു താരങ്ങൾ. സൂപ്പർ ഹിറ്റായ പടക്കളം, എക്കോ, എന്നീ ചിത്രങ്ങൾക്ക് ശേഷം സന്ദീപ് പ്രദീപ് നായകനായി എത്തുന്ന ചിത്രം കൂടിയാണ് 'കോസ്മിക് സാംസൺ'. മിന്നൽ മുരളിക്ക് ശേഷം, ഈ ചിത്രത്തിലൂടെ ഹോളിവുഡ് ആക്ഷൻ ഡയറക്ടർ വ്ലാഡ് റിംബർഗ് മലയാളത്തിൽ എത്തുന്നു എന്ന പ്രത്യേകതയുമുണ്ട്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ ചിത്രം റിലീസിനെത്തും.

Content Highlights: Sandeep pradeep to join hands with premalu makers for a romantic comedy